بسكويت المنيين
المقادير:
كيلو دقيق، كوب حليب، كوب زيت، كوب سكر،
½1 ملعقة كبيرة باكنج بودر، 2 ملعقة كبيرة كمون، قليل من القرفة ، وقليل من الملح.
الخطوات:
تخلط المقادير الجافة مع الدقيق
يبس الدقيق بالزيت ويفرك بأطراف الأصابع حتى يخلط الجميع
يعجن الخليط السابق بالحليب (يضاف قليلا) حتى تتكون عجينة قابلة للتشكيل
يترك العجين لمدة نصف ساعة حتى يخمر
يقسم العجين ويفرد على شكل مستوى ويقطع على شكل أصابع
ويرص في صينية الفرن
ويخبز حتى يصبح لونه ذهبيا
ويترك حتى يبرد
شكرا على اهتمامكم وردكم على طلبنا …………… يسلموا الايادي………..ززو يلا نشرب الشاي بالمنين
سمسمايه العسل عملت المنين وطلع ظابط بس انا ما عارفه كبايتك قدر شنو لانو انا زدت الزيت والحليب ربع كوب شب لاني استعملته في قياس الزيت والحليب عشان لقيت العجينه لسه قويه
بصراحة خلطة جميلة وشكرا ليكم كثير ….. مع تحياتي
شكلو شهي ياسمسماية
شكله فعلا رائع بس عندي إستفسار في نلس بختو فيه نشادر هل في ليها داعي
مرحب هيفاء
ايوة في ناس بتضيف النشادر بس منين امي وامك ما كان فيهو نشادر
النشادر بتخليهو هش زي البسكويت وا بيكون مقرمش
بعدين كل ما كان مفرود كويس يعنى ما تخين بيكون سهل
المنين روعه جدا نفس مقاديري لكن انا كباية الحليب دي بضعها في النار وبعصر فيها ربع ليمونه لحد ماللبن يتقطع وبصفيهو وبضيفو لباقي المكونات – بعدما ما اعجن في النهايه بضيف كباية السكر وبعجن بيها ده بديني منين مقرمش ممكن تضيفي زبده دي بتديها قوام اسفنجي لك تحياتي
ما فهمت هل تضيفين الماء المصفي من الحليب بعد تصفيته؟ وماذا تفعلين بالباقي النتخثر؟
ولك الشكر
سماسم يا عسل بشكرك علي اي طبخه قدمتيها وانا من هواة المطبخ وبصراحه زاد اعجابي بالمطبخ من بعدك اتمني اعرف انتي مقيمه في السودان ولا في الخارج ولو في السودان وين مكانك شكرا
يا ستي ربنا يديك العافية
انا مقيمة في السودان واسكن الخرطوم
تسلمي يا سمسماية .. يديك العافية
ويعافيك
ربنا يديكي العافية انا لي زمن بفتش علي وصفة المنين
تسلمي يا مني
يعافيك ربي
سلام سمسمايه
والله انا بقيت اخجل منك لكن بس متعشمه فيك عليك الله اعفي لي كان بنشف ريقك في رمضان دا………..
انا عملتو بس طلع قاسي شويه يكون من شنو؟ لو الزيت كتير يكون دا السبب؟
وتسلمي كتييييييييير
لا ياستي مافي نشاف ريق
اصلا انا لما عملت المدونة كنت بتوقع اسئلة وبكون سعيدة لما اجواب علي الاستفسارات
لا الزيت بالعكس بيخلي الحاجة مقرمشة لكن اصلا المنين بيكون قاسي شوية بعدين عجن العجين كويس وتخليهو يرتاح وتفريهو وتقطعيهو بحيث ما يكون تخين لان لما يدخل الفرن بيرتفع تاني
خلي القطعة رفيعة شوية
:)
ماعارفة اقول ليك بس بالجد انت خدمتينا خدمات كبيرة شديد وكل ما اتصفح المدونة بحس اني دايرة ماامرق منها
واسكن في سوبر ماركت عشان اطبق كل الوفات الجميلة دي بالجد تسلم يدك حبيبتنا
بت جلابي كيف اخبارك
ان شاء الله تطبقيها وتعجبك وتندمنيها كمان والله شرف لي
انت روعة يا سمسمة…جربته بسكويت جوزالهند طلع روووووووووووعة…وبقيت طوالى بعملو…وانا من هواة المطبخ وبحب اجرب اى حاجة القى مكوناتها متوفرة عندى فى المطبخ…وهسى قايمة اجرب المنين…عندى سؤال الكيلو بيساوى كم بالكوب المعيارى
معليش الرد متأخر بس الكيلو فيه (5) اكواب معيارية
عندى مشكلة…انا قسته قبل كده الكيلو لقيتو 7 اكواب ونص…وفتشته ولقيت ناس بيقلو 4وتانين 5 وتانين 8اكواب اها دى كيف؟؟؟والاكواب المعيارية بتختلف ولا شنو انا ما فاهمة؟؟؟
الاكواب المعيارية 240 مل او 250 مل دا قياس الكوب وانت بتلقي مكتوب عليه من جوة
بعدين الدقيق زاتو بيختلف في العيار بمعني لو مغربل واخلو الهواء بيكون بالزيادة فانت املي القوب كويس وساويه عشان ما تكون في فراغات للهواء
لكن ان شاء الله اقيس ليك الكيلو بالاكواب وارجع اقول ليك كم يساوي وكيف قسته
كتر خيرك يا عسل…جننتك…انا عملته المنين وطلع خطييييييييييييير…تسلم الايادى…ومستنيه تقيسى وتقولى ليا…يديك العافية وتسلم يداك
الكيلو يساوي 6 اكواب دقيق غير منخول (مغربل) يعني مافي بين ذراته هواء
مرحب سمسمايه بهنيك علي الموقع الجميل
حابه استفسر كيلو الدقيق بكون كم كوب
حباب نانا الكيلو فيه تقريبا 6 اكواب قياسية (250مل)
سمسمه مااااااااااااااااشاء الله
دايما مبدعه
سمسماية اذيك ياعسل وتسلم يدك
عايزة اسالك مقاس الكوب العملتى بيه المنين الكوب المعيارى وللا كوب عصير عادى
وانا لسه مستنياك تشوفى لى وصفة للسجوك والبيرقر
تسلمى ياعسل
ام اية كيفك كوب العصير العادي بس ان شاء الله ح اعمله مرة تانيةب الاكواب القياسية لانها استاندر
بالنسبة للسجق والبيرقر متذكرة بس الايام دي معاي ضيوف (المغتربين) بس افضي شوية وكل شيء ح اعمله ليكم
:)
تسلمى ياعسل انتى وان شاءالله ما نعدمك
تحياتنا لضيوفك واجازة سعيدة ليهم ان شاءالله وقولى ليهم خليتو الدوحة مظلمة رغم انى لسه مابعرفهم
الكوب بتاع السكر والحليب والزيت قدر كيف ياتو كوب يعني وجززاك الله خير ياسمسماية عاوزة اعملو اسه
مشكورة ياسمسماية على المجهود العظيم انا حادادعى ليك كل صلاة لانك فكيتى حيرتى الله يديك العافية اتمنى ان اتواصل معاك اختك رشا السودانية
حبيبتي يديك العافيه والله بس انا حابه اعملو لكن بسالك من طريقه الرص في الصنيه كيف عندي واحده صحبتي بتكب العجينه في الصينيه وبتقطعه بعد مايتحمر
ام فطومه المنين ما زي بسكويت اليانسون يعني ما بنفع تختي العجينة وبعدين تقطعيها لا المينين عجينته قوية توعا ما بتحتاج انك تفرديها وتقطعيها
تسلمي ياغاليه وماعدمناك انشاءالله طيب سؤال تاني معليش العجينه طلعت ليا قويه مع اني عملتها خطوه خطوه زي ماانتي كاتبه وانا الحاجه العارفها انو المنين بطلع هش
المنين بيطلع مقرمش ما هش
اليانسون هو الهش
امن بتكوني ملخبة بين الاثنين وسؤالك الاول بيأكد لي ان ملخبطة :)
تسلمي ياعسل لكن انا عمله خطواتك كلها والعجينه طلعت قويه وحتى لمن بديت ارصه في الصينيه واتخبز طلع ليا قوي
طبعا لسه ماجربته يادوب ماشه المطبخ وبعدين برسل ليكم
سلامات يا سمسمه…ليك وحشه…انا عملته المنين بس عندى مشكله…العجينه ما بتكون زى حقتك فى الصوره بتكون ناشفه ومفتته شويه…تكون المشكله شنو؟؟؟انا اضفته شوية زيت تانى وعجنته بس برضو ما زى حقتك…بس اتلمت شويه…وخبزتها طلع حلو شديد…
غاليتي كيفك؟ شوفي لازم المقادير تكوم مظبوطة يعني المنين دا مقاديره لكيلو كوب حليب كوب سكر كوب زيت (الكوب كوب الشب)
جربي تاني يا رباح كيد ح يظبط معاك
برضو في ناس بتضيف نشادر عشان يكون هش بس انا ما بفضله
الحمدلله كويسة…بس مشاغل الحياة مرات بتاخد الزول…انا عملته بالكوب المعيارى…ح اجربو اليوم بالكوب الشب واديك النتيجة…
ظبط يا سمسمة تسلمى يا عسل…غلطتى انى اشتغلته بالكوب المعيارى…طلع حلو شديد…
تشكري ياسمسمة الليلة كنت عايزة اضرب لامي اسالها من المنين لكن لقيتو عندك يديك العافية
يديك العافيه انا متزوجه جديد وانتي افدتيني بالجد كتييير لانو وصفاتك مضبوطه ميه بالميه مافي شي عملته ما زبط واتفلهم ليك عند نسابتي واهلي مسميني الطباخه الصغيره انا بشكرك من كل قلبي وانشالله ماتشوفي يوم حزين تكون ايامك كلها فرح زي ما مفرحاني خليتيني اكسب راجلي ونسابتي واهلي
مبااااااااااااااااااااااالغه جربتها وطلعت روعه اى زول قال لى اشترتيهو من وين
شكرا لفنك وانا زيك بحب الطهي من عمري سبعة سنين
تسلم الأيادي يا سمسمايه اتبعت طريقتك وطلع المنين
خطيييييييييير ربنا يديكي علي قدر نيتك ويسعدك
سمسماية نشكر ك على المجهود الجبار دة واتعلمنا منك كتير
ام احمد
صباح لخير سمسمايه انا عملته المنين وبنشادر لكن جانى فيهو حبة قو يكون من شنو وعملته ملعقه بس باكبودر ولبن بدره
سمسماية انت رائعة ….أنا اول مرة ادخل المدونة كنت يفتش عن المنين واندهشتة بيك….ياخي الله يديك العافية وتاني طوالي حاتلقيني في وشك ….تحياتي
سلام ياسمسمايه
الاخت سمساية جزاك الله خير انا كنت مابعرف شئ عن الطبيخ بس هسة بقيت بروفشينال خالص بفضلك تسلمي انا اسمي فاطمة ساكنة الخرطوم وعروس جديدة لي سنة ونص يادوب . اتشرف بمعرفتك
مشكوره يا غاليه والله كان نفسي فيهو من زمان شديد مره اكلتو من وحده لكن ماوصفتو لي كويس المهم ناويه اعملو فورا وادعي لي انجح معاي .
السلام عليكم حبيت اقول ليك انا اليوم جربته المنين وظبط معاي وكل شويه اكل منو لمن بطني وجعتني شكرا ليك يااحلي سمسمايه وربنا يخليك لينا.
salmt simsim kifek
جزاك الله كل خير
شكرا كتير سمسمايه وكفيتينا شر سؤال الناس ….وصفاتك روعه وانا وصاحباتي من عشاق مطبخك
السلام عليكم انا عايزه وصفة الكعك بالعجوه او النعوميه
تسلمي يا احلي سمسمايه احبك في الله
السلام عليكم سمسمايه صراحه اول مره ادخل لكن وصفاتك جد بتشهي …سؤالي هل الوصفه فيها الحبة السوداء ؟؟؟ ولا الحبوب السوداء دي شنو و شكرا
رووعه بفتش لي زمن تسلمي